[分享] 沙巴4日3夜遊記(多相,附加:沙巴地圖及旅遊資料)

7170296

未決定去沙巴時,都考慮過其他地方,但浮羅交怡,宿霧直航問題,布吉又無機位,所以!決定去沙巴.首先要多謝各位,我喺討論區/blog睇左好多post,攞左好多有用嘅資訊,而今次寫這遊記的原因, 係希望可以提供有用的資料俾大家參考:

Package: 永X旅遊
16Oct09 KA61 08:00-11:05
19Oct09 KA62 19:50-22:50
酒店:Shangri-La's Tangjung Aru
HK$4399+tax

Local Tour: 香港e-mail訂沙巴遊:Sabahyou
Day 1----Oct 16 Friday   紅樹林+長鼻猴+螢火蟲遊(14:00-21:30pm)包晚餐 每位RM160
Day 3----Oct 18 Sunday 九魯河激流泛舟(湍急度1-2)(08:30-15:00pm)包午餐每位RM170


佢地都有交帶,出發前1日打過電話俾我,向我提及有關資料同埋send左個有用嘅地圖俾我.

全程費用:
$4399+435 x2人 + $4500(四天洗費) = $14168.00


第1天~出發!

天未光就起身(05:15am)因為要寄行李,所以就算online check-in都要07:15am到機場
港龍 KA062: 0805起飛 HK to Kota Kinabalu




差唔多到降落嘅時候見到一個好靚嘅島,唔知咩名?


11:00am到達 Kota Kinabalu 機場,酒店Shangri-La's Tanjung Aru接送到酒店,慳番RM20.
(我係send e-mail check酒店先知,佢地覆香港Travel Agent安排了車接送,但我完全唔知,我係喺永X訂的)




大概10分鐘嘅時間就到達,酒店~Shangri-La’s Tanjung Aru,大堂有d原始嘅氣息:



我地就係坐喺度check-in,因為有專人同我地Check-in,佢亦向我地介紹酒店嘅設施,由於先前喺香港send左mail問酒店,要求高d嘅樓層及提早check-in,佢地回覆會盡量安排,可能係星期五入住關係所以即刻有房



今次住嘅係Kinabalu Wing嘅Seaview Room



房內唔算豪華,但有種好舒服嘅感覺



房外風景亦好靚,我住嘅係頂樓(7樓),但如果住底d,可能會俾出面嘅椰子樹阻住了風景

7170296

安置好行李後,打個電話俾沙巴遊嘅Clement,re-confirm陣間紅樹林出發時間(14:30pm),就出發打的到市中心食晏(RM15),第1餐食嘅係源利茶餐室(新記肉骨茶隔離)




我點左魚肉,鮮蝦,豆卜,喇沙魚仔麵加桔仔冰,老闆係客家人,廣東話溝通


味道都可以,魚肉同鮮蝦都好食,但我嫌個喇沙湯唔夠濃,埋單:兩個人RM18,都幾平,之後喺轉角位間7-11買左d水就打的返酒店,準備出發.上車後,原來司機都係客家人,佢叫Mr.Wong,當然可以廣東話溝通,沿途仲同我地講解沙巴,佢話沙巴無分四季,全年都係2x-3x度左右,途經幾靚嘅屋,佢話大約五十幾萬馬幣(都幾抵),不過佢話最近沙巴嘅天氣一般,有時落雨,10分鐘左右就返到酒店,最後仲俾左張咭片我,用車可以Call佢


返到酒店過左陣就出發去紅樹林了,同車仲有6個人及廣東話嘅導遊(阿May),一行共9個人出發,去紅樹林大約要個半鐘多d,但會停兩個地方,方便大家去洗手間,大約半個鐘左右,到達第1個停嘅地點就係生果檔(D生果都好新鮮,而且唔係好貴),喺生果檔上面嘅紅毛丹樹.


買完後再上車,再坐左半個鐘左右,到達第2個停嘅地點:沙嗲檔,地方好簡陋,但幾有風味,導遊(阿May)買左30串請我地幾個食,d汁幾好味



燒雞翼檔,我買左兩隻,唔係好記得幾錢,好似RM3,味道都ok


之後繼續行程,大概再坐多7-8個字車(16:30pm)就到紅樹林了,我地先喺餐廳坐左陣,著好救生衣,攞望遠鏡等,準備上船(記得搽好蚊膏及貼大量蚊貼,因為真係好多蚊),沿河一路遊覽,風景真係幾靚


搵左一陣,終於搵到長尾猴及長鼻猴(查實我都唔知邊隻打邊隻,只係抱住去玩嘅心態,無咩所謂啦!)



都大約玩左個幾鐘,太陽都日落了,沙巴日落真係同香港唔同,藍天白雲,好清好靚, 我地影埋相就回程食飯




上岸,坐左陣就食飯(18:30pm),local tour包的,都係食飽佢啦!其實唔算好差,d菜,同個湯都ok,之後買左支芒果雪條,但味道較淡


之後,再上返船出去睇螢火蟲了,最可惜係影唔到相,不過都幾得意,用電筒向棵樹度照,佢地就會閃閃下發光,真係好多,都算係一個唔錯嘅體驗!大約20:15pm就回程,原本想叫導遊車我地出市區食宵夜,但可能早機好攰,而且明天我地會自己出島玩,都係返酒店休息

返到去已經21:45pm,打電話俾Mr.Wong約好明早10:30am車我地去Jesselton Point碼頭,執拾好明天出島的物品,準備瞓覺時發現外面落好大雨,但一早plan定了行程而第3日去激流,所以無得改,唯有起身睇下點再算

7170296

第2日~Manukan Island

朝早起身望出窗外無落雨,但天陰陰有d黑雲,無計一場尼到無理由唔出島,唯有繼續行程.先喺酒店Cafe Tatu食個好富嘅早餐先,真係好多野食:奄列,粥,湯粉,薄餅,魚,咖哩,春卷,鳳尾蝦,沙律,就連果汁都有六款,基本上同午餐,晚餐無咩分別.



好豐富嘅早餐,連麵包都有幾十款,我地攞左幾塊麵包準備出島餵魚



食完早餐後上返大堂已經見到Mr.Wong喺度等緊我地了,上車後Mr.Wong話尋晚好大雨,落雨後d水會濁d,可能無咁清,佢仲等登沿海邊waterfront行向我地介紹海皇城,Warisan Square,不夜天,KK Plaza及菲律賓市場等景點,另佢話凱悅酒店依家內部裝修,遲d會新d不過可能會加價,而喺凱悅旁邊亦起緊一個好大嘅商場.

好快就到左Jesselton Point,Mr.Wong亦泊左架車喺車場同埋我地一齊入去買飛(方便好多唔使問邊個counter買船票,邊個counter買稅...),先前打算雙島遊(Manukan + Mamutik),但由於時間唔夠已經11:00am,我地打算15:00pm回程,所以Mr.Wong亦建議我地去Manukan,無所謂啦!(1個島RM17+稅RM6+上島RM10 x 2),最後俾左車費RM20,Mr.Wong亦離開了,出到去等上船嘅時候,碼頭嘅員工問我地租唔租浮潛工具,我地當然租啦!救生衣+鏡(RM15 x 2).




11:30am出發了,天色真係麻麻地.


途中都幾大浪,大約15-20分鐘左右,到達第1個島,想落船之際,船家話呢個係Sapi(沙比島)我地未到,再坐多大約10分鐘終於到達目的地:Manukan.落到船已經見到好多魚喺碼頭邊了.



我地亦1部份帶尼嘅麵包餵魚,d魚亦一擁而上



個沙灘好靚,唔算好多人,d水都算幾清,行到入去收費站俾錢(RM10 x 2),影左幾張相就沿路行入去更衣室換衫



  

行到去更衣室時,發現大家所講嘅科目多龍出現,佢比較細條同唔多理人.



換完衫後,行返去碼頭邊附近放底行李,開始浮潛了,開頭都擔心行李問題,但手機同錢喺我防水袋度,而相機一早就喺酒店入左防水殼會跟身,最多咪唔見d衫,況且島上有衫賣,唔驚啦!(其實好多人都係咁),開始游出去浮潛,大約1.5米左右就開始有魚了,可能尋晚落雨,d水唔算好清,但都有好多魚



玩左一陣差唔多13:00pm了,返上岸去士多買d野食(抄米粉,炸雞翼)同野飲,就行返去抖下,d野食賣相真係麻麻又唔熱,但得佢1間士多,無計!不過味道都唔差,如果熱d就好好多.抖左陣,再手揸帶尼剩餘嘅麵包再游出去餵魚,原來d魚真係會追住人隻手架,仲俾佢地咬左啖添,不過無咩事!再玩多陣已經14:15pm要開始換番衫準備回程,換完衫返碼頭等船影左幾張相就回程了.





開船後發覺前面有個細沙灘嘅島仔,原來呢個就係Mamutik,之後都係喺大浪嘅情況下回程


[ 本帖最後由 7170296 於 2009-11-8 11:55 編輯 ]

7170296

上岸後覺得有d餓可能頭先食得太少,所以決定步行返市中心食d野先返酒店Sunset Bar睇日落,其實行返去市中心都好,可以影下相,而且都好近大約10分鐘就行到新記肉骨茶附近,




再行前少少見到~味雅雞飯,正想行入去之際,老闆就用普通話同我地講:賣晒了,16:00已經賣晒?可能沙巴d人朝早同下晝都好鍾意食飯啦!



無計唯有再行,喺轉角位見到~新美香,所以入去買左肉乾先(幾好食,不過都唔平要成RM40/1包),裡面仲有張34年前沙巴嘅相,我仲影左依家外面嘅環境,我覺得除左d車唔同之外,都無咩大轉變




唯有繼續行去搵野食,經過菲律賓市場,不過太早未開,而途經手工藝市場有人向我兜售假Rayban,不過無興趣所以唔知幾錢,行下行下到左Centre Point了,見到Warisan Square有間食雞飯嘅舖頭於是入去試下,點知幾好食喎!d雞好滑,好好食




食完飯過去The Face Shop睇下,不過老婆話唔夠韓國平喎,之後喺Daily Fresh買左件朱古力窩夫RM2.5(好食),跟住就打的返酒店睇日落.



返到酒店時間係17:15pm,時間啱啱好因為Sunset Bar開17:00-20:00pm,但行到過去時望到間Bar竟然一枱客都無?行到過去先見到今日俾人包左場了,咁唯有坐喺側面嘅櫈度睇日落,沙巴嘅日落真係好靚




      

而我地亦見到朋友同我地描述嘅情況:當大陽完全落山後,天空會由橙紅色轉成紫紅色




睇完後返上房梳洗準備晚上出去食飯,今晚會去大家都好熟悉嘅双天度食海鮮,可能晏食野未肚餓,而双天又喺Centre Point附近,所以我地決定去Centre Point地庫嘅超市買d野食做手信先,去到地庫間超市其實都唔係好大,不過都買到d野(其實大家想去超市買野仲有一個好選擇,留意第3日行程),上番地面行左5分鐘就到達双天了,其實双天係由多間海鮮酒樓以u字型排列而成的有蓋大排檔,中間的位置就係坐位,而双天旁邊就係:珍珠海鮮酒家,我地亦先揀左海鮮再坐底




我地點左:斑馬瀨尿蝦,象拔蚌仔,魔鬼魚,飛螺,樹仔菜同餃子(分開叫的,有人會向你兜售)






最後埋單RM160,價錢幾平而海鮮亦好新鮮,但味道始終無香港咁好,不過去旅行最緊要咩都試下,咁樣可以試多d唔同嘅野

差唔多22:00pm打的(RM15)返酒店休息,聽日要早起身,因為要去九魯河玩激流,Clement今日亦打過尼remind聽朝08:30am River Bug會有車過尼接我地,佢仲叫我地一定要搽防晒,因為都玩成個幾鐘會好晒




[ 本帖最後由 7170296 於 2009-11-8 11:56 編輯 ]

7170296

第3日~Kiulu River Rafting(1-2級) 九魯河激流

朝早起身陽光普照,先去食個早餐先,今日時間就無咁充裕了,但我都攞左支唔知咩味嘅雪條食,味道就麻麻地



8:30am準時返去大堂已經有工作人員等緊我地,同行仲有1大1小嘅外籍人士,接我地嘅車係大型旅遊巴,因為同一齊出發共24人,香格里拉係頭站之後會停多兩站載人,第1個站係Promenade Hotel,而第2個係Le Meridien



同團都有一半香港人,全程一個鐘頭多d嘅車程我就繼續影下相,



途中亦經過水上清真寺同埋1d舊式嘅民居



11:00am到達目的地九魯河了(1-2級),其實九魯河係位於沙巴嘅東北面,而3-4級嘅 Padas River 巴達斯河係喺西南面,兩條係完全唔同嘅河,為免相機被沖走所以決定放底相機無得影相了

之後個零鐘頭嘅旅程都好好玩,沿途風景亦好靚,只有幾個位較為刺激,由於途中會互相潑水同埋可以落水游,所以記得帶衫褲去換,我地當然有落水游,d水好清涼好舒服一定要試下,12:30pm到達終點,上返車攞衫去換,之後就食飯,飯餸嘅款式同味道都無紅樹林咁好添



食完飯逛一逛買左四張相(RM50)就上車回程了,可能好攰架車未落到山我地就瞓左了

15:30pm返到酒店,由於無喺酒店游過水,所以我地喺酒店嘅泳池暢泳一下(雖然我唔擅長游水,但我都覺得泳池太細)



游完水返房換過衫我地就去Sunset Bar睇日落,我地叫左2杯買1送1嘅cocktail同埋10串沙(RM43),杯野就唔好飲但d沙嗲就勁好食,員工亦好nice,今日較多雲但無礙沙巴迷人嘅景色





原本今晚我地打算去海皇城食海鮮,但尋晚已經喺双天試過況且又覺得無咩特別,所以決定改去新商場1Borneo行下食飯,呢程車就較遠都坐左半個鐘(RM35),到達後我地先去地庫嘅超市買手信,呢個超市比起CentrePoint果個大好多,應該有三至四個,裡面亦好多野賣(佢類似家樂福,衫褲鞋襪,食品,電器一應拘全)




買完野之後就去搵野食,見到有間食馬來西亞野嘅餐廳~Home,於是入去試下





我地叫左蝦麵,抄菜,雞翼,兩杯野飲(RM53),味道都幾好,個湯幾濃,只係d麵鹼水多左d



食飽後喺商場行左陣,個商場真係幾大,而最特別嘅係呢個商場無咩人,以下d相係我喺18Oct09 星期日 20:30pm左右影的　



之後我地就坐的士返酒店執拾行李,預備明天返香港了

7170296

第4日~ 自由活動 + 準備回港

最後1日無咩特別行程,所以晏d先起身,但我地都無放棄個早餐,可能太晏了10:15am,所以先前覺得好食嘅野都無乜了,款式亦唔多



hea多陣就Check-out了(13:00pm,可以late check-out),將行李寄存喺酒店後就打的去Centre Point搵野食順便可以行下



其實呢個商場都已經好舊了,仲有d七八十年代嘅味道




去到唔記得幾多樓見到有間五星級海南雞飯餐廳,於是入去試下,我點左個肉丸湯味道都幾好



食完野行番出街後,見到有罐裝桔仔冰賣就買左罐試下,味道幾好,可惜我個喼已經爆滿,如果唔係會買d返香港



喺街行多陣影埋相後就打的返酒店了



返酒店見有時間就四周圍影下相





遠處既中間位置果兩個島,前面細果個係Mamutik,後面大果個就係Manukan,而右手面細果個就係Sapi島



細果個係Mamutik,大果個係Manukan



最左手面細果個就係Sapi島



我地見仲有時間所以喺臨離開沙巴之前去Sunset Bar飲杯野同影相,今日果杯Cocktail比尋日果杯好飲好多,而沙嗲亦保持高水準




大約18:00pm我地坐酒店接送嘅車離開酒店去機場




去到機場見有時間未上得機,我地喺機場買左d朱古力,然後去左一間叫做Jesselton Cafe食麵,味道就當然無出面咁好食啦








食完呢碗麵,我地就上機返香港,完結左今次沙巴之旅了

7170296

總結:
好快就完成左沙巴之旅,第1次尼到呢個地方真係無揀錯,沙巴的而且確係一個渡假嘅好地方,佢俾人一種好優閒嘅感覺,地方好乾淨舒服,人亦唔多,但4日夜時間唔係咁夠,如果去多兩日時間會好d,1日去埋神山而另一日就可以去東姑阿都拉曼海洋公園或者Mantanani美人魚島潛水.

住宿:
今次住嘅酒店唔算豪華,但有種好優閒好舒服嘅感覺,酒店所有嘅員工真係好nice,Sunset Bar嘅員工主動過尼同你傾計添,可能係呢份嘅熱情感染,連所有遊客都好nice,呢d都係喺香港無辦法搵到


活動:
激流真係值得一試,1-2級其實老少咸宜,落唔落水你自己決定,想刺激就玩3-4級,如果只係想出島玩下,可以自己去因為平d,但如果想潛水就跟local tour好d,因為需要安排及唔同地方的


食市/商舖:
沙巴本身地方好大但其實市中心嘅範圍好細,大部份都係集中喺Centre Point至凱悅酒店一帶,由Centre Point行去Jesselton Point最多都係15-20分鐘,所有食飯買野嘅地方集中晒喺度無須搭車(1 Borneo除外),亦唔洗買旅遊書

交通:
主要代步都係的士一般都係RM15-20,而1 Borneo較遠要RM30-35,留意的士內係無咪錶上車前要問價,如果住喺市中心可以連車錢都慳番添





以上都係我個人意見,希望可以俾大家參考下,另外尚有1d資料,大家都可以睇睇:


http://sabahyou.com/map/map016_kkmaps.php

youhello507

其實神山果面都幾好玩 o架.

eluna

你沙巴的遊記好精彩啊，請問有導遊阿may的電話嗎？

travelpooh

resort果度都好似係有個碼頭的, 我想問下, 出去Jesselton Point自己搭船同係resort碼頭相差幾多呀?? (因為我見搭taxi出碼頭都要rm15)